Link açıqlığı

Aqyarda qırımtatar iş adamı Lenur İslâmovğa ait olğan Just Bank bölügi qapatıldı. Qırım.Aqiqat mühbiri bildirgeni kibi, yaqında Bоlşaya Morskaya soqağı boyunca yerleşken banknıñ bölüginde insanlarnı qabul etmege toqtadılar. Bank hadimleri ise iş yerlerinde buluna edi.

Saba noyabr 3 künü, binada hadimlerniñ bulunmasına baqmadan, bank bölüginiñ qapıları öyle de açılmadı. Qapıda bank çalışmağanı aqqında ilân asıla. Bank telefonlarını kimse kötermey.

Noyabr 2-de saba Rusiyeniñ Merkeziy bankı İslâmovğa ait OOO «Cast Bank» müessisesiniñ litsenziyasını lâğu etti. Qırımtatar iş adamınıñ Qırım.Aqiqatqa bildirgenine köre, bu tedbirlerni Qırım qamaçavı ile bağlay. O, onıñ teşkilâtçılarından biri ola.

Noyabr 2-de saba Qırımda ATR telekanalınıñ sabıq hadimleri Lilâ Bucurova, Elzara İslâmova ve telekanal saibi Lenur İslâmovnıñ ana-babası yaşağan evleri, em de Moskvadaki evinde tintüvler yapılmağa başladı.

İslâmovnıñ fikrine köre, işbu areketler – onıñ Kremlge qarşı mevamınıñ neticesi ve onıñ tarafından teşkil etilgen Qırım qamaçavına cevaptır.

XS
SM
MD
LG