Qırımtatar Milliy Meclisiniñ reisi, Ukraina Yuqarı Radasınıñ deputatı Refat Çubarov ukrain ükümetinden Qırımğa elektrik energiyasınıñ berilmesini toqtatmağa talap etti. Böyleliknen o ATR telekanalınıñ saibi ve sabıq hadimleriniñ evlerinde keçirilgen tintüvlerge cevap bermege teklif ete. Bu aqta Çubarov noyabr 3 künü Kiyevde matbuat konferentsiyası devamında bildirdi.
Meclis başı degeni kibi, ukrain akimiyeti şimdilik işğal etilgen yarımadada memleket vatandaşlarınıñ aqlarını qorumaq içün bir şey yapmadı.
«Memleketniñ akimiyetinden Qırımnıñ işğalci ükümetine tenbiye olaraq, işğal etilgen Qırımda Ukraina vatandaşlarınıñ, insan aqlarınıñ qoruvı içün yekâne aletni qullanmağa talap etemiz – afta devamında eki-üç künge elektrika ile teminlevni toqtatmağa ve bu meseleni Qırımda insan aqlarınıñ qoruvı manasında muzakere etmege», – dey Çubarov.
O şunı da qayd etti ki, Rusiye Ukrainağa cevaplanıp, ukrain ve Rusiye energosistemalarından faydalana bile, böyle alda, dey Çubarov, Ukraina devamlı söndürüvlerni qullana bile.
«Küç olmasa, devlet mevamını köstermelimiz, vatandaşlarımıznı qorçalamağa çaremiz bar olğanını», – qayd etti Çubarov.
Aytqanı kibi, ukrain akimiyeti Qırımda böyle areketlerni amelge keçirmese, vatandaşlar bunı öz teşebbüsi ile ete bile.
«Kesen-kes areketlerge keçmelimiz, aks alda bunı insanlar etecek… Cemiyetimiz olduqça sabırsız olğanını bilemiz. Adalet-adaletsizlikni özcesine añlağan insanlar er vaqıt tapılacaq. Yaramay, böyle areketler er zaman qanuniy olamaz», – dey Çubarov.
Bunıñ ile Meclis reisi böyle insanlarnı takbih etmegenini bildire. Çubarov dey ki, prezident Petro Poroşenkonıñ noyabr 2 künü Yuqarı Radada Blok Petra Poroşenko firqası ile körüşüvi devamında Qırımğa elektrik energiyasınıñ berilmesini toqtatmaq kibi meselede añlaşma alındı.
Noyabr 2-de saba Qırımda ATR telekanalınıñ sabıq hadimleri Lilâ Bucurova, Elzara İslâmova ve telekanal saibi Lenur İslâmovnıñ ana-babası yaşağan evleri, em de Moskvadaki evinde tintüvler yapılmağa başladı.
Qırımnıñ Rusiye Federal havfsızlıq hızmeti (FSB) idaresiniñ malümatına köre, tintüvler ATR saibine qarşı açılğan cinaiy iş çerçivesinde keçirile.
Noyabr 2-de saba Rusiyeniñ Merkeziy bankı İslâmovğa ait OOO «Cast Bank» müessisesiniñ litsenziyasını lâğu etti. Qırımtatar iş adamınıñQırım.Aqiqatqa bildirgenine köre, bu tedbirlerni Qırım qamaçavı ile bağlay. O, onıñ teşkilâtçılarından biri ola.
Ukraina İçki işler nazirligi ATR qırımtatar telekanalınıñ müdiri Lenur İslâmov ve telekanalnıñ sabıq hadimleriniñ evlerinden keçirilgen tintüvler, em de Qırım işğaline qarşı çıqqan cemaat teşkilâtlarınıñ faaliyetine keder etüv kibi insan aqlarınıñ bozulması boyunca eki cinaiy taqiqatqa başladı.
