Link açıqlığı

Saatnıñ esas haberi

Ukrain naziriniñ keñeşçisi Qırım tintüvleri sebebinden QMC prokuraturasına muracaat etti


Ukraina haber siyaseti naziriniñ keñeşçisi Emine Ceppar Ukraina Baş prokuraturası yanında QMC prokuraturasına Qırımda ATR telekanılınıñ binasında, telekanalnıñ sabıq baş müdiri Elzara İslâmova, onıñ muavini ve Qırım jurnalisti Lilâ Bucurovanıñ evlerinde, telekanal saibiniñ ana-babası ve tatasınıñ evlerinde tintüvlerniñ keçirilmesi ve ATR saibi Lenur İslâmovğa qarşı cinaiy işlerniñ açılması sebebinden muracaat etti.

Bunı ukrain nazirliginiñ matbuat hızmeti bildire.

Nazir keñeşçisiniñ sözlerine köre, telekanal ve hadimlerine basqı tek arta ve buña Ukraina prokuraturasınıñ organları seslenmek kerek.

«Telekanalnıñ sabıq yolbaşçılığı evlerinde tintüvler, vesiqa, bilgisayar ve telefonlarnıñ tutıp alınuvı, ATR saibiniñ Qırımda bulunğan qorantasınıñ qorquzuvı – mesken toqunmazlığınıñ bozuluvı ve abrav kibi tanıla bile. Menimce, tintüvlerge ve cinaiy işniñ açılmasına alâqası olğan insanlar ertemi-keçmi cinaiy mesuliyetni körmeli», – qayd ete Ceppar.

Nazir keñeşçisi dey ki, yapılğan areketlerde Ukraina cinaiy kodeksinine köre, cinayet hususiyetleri bardır.

Noyabr 2-de saba Qırımda ATR telekanalınıñ sabıq hadimleri Lilâ Bucurova, Elzara İslâmova ve telekanal saibi Lenur İslâmovnıñ ana-babası yaşağan evleri, em de Moskvadaki evinde tintüvler yapılmağa başladı.

Qırımnıñ Rusiye Federal havfsızlıq hızmeti (FSB) idaresiniñ malümatına köre, tintüvler ATR saibine qarşı açılğan cinaiy iş çerçivesinde keçirile.

Noyabr 2-de saba Rusiyeniñ Merkeziy bankı İslâmovğa ait OOO «Cast Bank» müessisesiniñ litsenziyasını lâğu etti. Qırımtatar iş adamınıñQırım.Aqiqatqa bildirgenine köre, bu tedbirlerni Qırım qamaçavı ile bağlay. O, onıñ teşkilâtçılarından biri ola.

Ukraina İçki işler nazirligi ATR qırımtatar telekanalınıñ müdiri Lenur İslâmov ve telekanalnıñ sabıq hadimleriniñ evlerinden keçirilgen tintüvler, em de Qırım işğaline qarşı çıqqan cemaat teşkilâtlarınıñ faaliyetine keder etüv kibi insan aqlarınıñ bozulması boyunca eki cinaiy taqiqatqa başladı.

XS
SM
MD
LG