Aqmescitniñ Kiyev rayon mahkemesi «fevral 26» işi boyunca yaqalanğan Mustafa Degermencini noyabr 19-na qadar apiste qaldırdı.
Bunı Qırımtatar Milliy Meclisi reisiniñ birinci muavini Nariman Celâl bildire.
«Mustafa Degermenciniñ mahkemesi bitti. Prokuror tevqif müddetiniñ 19.11.2015 qadar uzattırılmasını talap etti. Salon tolu. Tuvğanları, dostları, cemaatçılar. Mahkemeci, prokuror ve taqiqatçığa «likbez» keçirip, teneffüsten evel qabaatlanğannıñ tarafını aldı. Tevkif uzattırıldı. Mahkemeciniñ oyunına qıymet kesmedik. Amma şeñlendirdi», – yazdı o Facebookta.
Yaqında Mustafanıñ babası Bekir Degermenci Qırım.Aqiqatqa tarif etkeni kibi, Aqmescitniñ SİZOsında yarım yıl bulunğan Mustafa Degermencige taqiqatçı Meclis reisiniñ muavini Ahtem Çiygozğa qarşı delillerni bermege teklif etken edi.
Mustafa Degermenci mayıs 7 künü Sudaqnıñ Suvuq Sala qasabasında yaqalandı.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı.
