Link açıqlığı

Ukraina prezidentiniñ Donetsk ve Lugansk vilâyetlerinde vaziyetniñ tınçlandırılması boyunca vekâletlisi, Ukraina Yuqarı Radasınıñ deputatı İrina Geraşçenko Qırımda noyabr 2 künü olğan vaqialardan soñ siyasetçilerni memleketniñ qoruvı ile faalce oğraşmağa ve Qırım meselesini sustırmamaq çağırdı.

«Menimce, ukrain siyasetçilerine uyanmaq kerek, er keske, akimiyet, muhalifetke, özüne kelmek, bu ücüz oyunnı toqtatmaq ve işnen oğraşmaq – memleketni qorumaq kerek. Ve bizni afu etiñiz, qıymetli qardaşlarımız – tatarlar», – yazdı o Facebookta, Lilâ Bucurovanıñ beyanatını izaatlap.

«Lilânıñ yazğanını oquyım ve yüregim utanuv ve accıdan ağıra, bugün imayeñiz içün o qadar az yapamız. E, bugün Qırımnı insanlarnı horlağan ve canlarını ağırtqan FSB alçaq eriflerinden qurtarıp olamaymız, Lilânıñ torunlarını ve diger ukrain ve tatar balalarını qorçalap olamaymız… Amma Qırım aqqında unutmaq ve susmaq aqqımız yoq», – dey Geraşçenko.

O şunı da qayd etti ki, Ukraina ükümeti «Qırım boyunca ve onıñ qaytarılması boyunca siyasetni işlep çıqarmaq kerek».

Saba noyabr 2 künü Qırımda ATR qırımtatar telekanalınıñ sabıq hadimleri – ATR telekanalınıñ muarriri olğan Lilâ Bucurova, sabıq baş müdiri Elzara İslâmovanıñ ve telekanal saibi Lenur İslâmov ana-babasınıñ, Moskvada yaşağan İslâmovnıñ tatası Lenaranıñ evlerinde tintüvler keçirildi.

Aynı şu künü Rusiye Merkeziy Bankı İslâmovğa ait «Just Bank» şirketiniñ litsenziyasınıñ qaytarılması aqqında malümatnı aşkâr ettti. Qırımtatar iş adamı Qırım.Aqiqatqa aytqanı kibi, işbu areketlerni Qırım qamaçavı ile bağlay.

Ukraina Tış işler nazirligi Qırımda insan aqlarınıñ bozuluvı boyunca eki cinaiy işni açtı

XS
SM
MD
LG