Qırım qamaçavı yarımadanıñ himiyaviy saasınıñ inkişafına menfiy sürette tesir etti: memuriy sıñırda «Krımskiy titan» ve «Krımskaya soda» şirketlerine zaruriy malzemelerni ketirip olamaylar.
Bunı Qırım.Aqiqat Radiosınıñ aqşam efirinde jurnalist Osman Paşayev bildirdi.
Onıñ sözlerine köre, Qırım vatandaşlıq qamaçavınıñ tesiri malnıñ ketirilmesinde degil de, himiyaviy istisalında daa da semereli oldı. Zavodlarnıñ istisalı «qat-qat eksildi», dey Osman Paşayev.
«Qırımda himiyaviy yedekler aqqına aytacaq olsaq, qamaçav pek effektivdir. Aqiqaten, şimdi öz şahsiy fikrimni aytarım, amma men bu şirketlerniñ toqtatılması ve qapatılmasınıñ tarafdarı olam. Çünki Sivaş ile soñki 10-20 yıl içerisinde olğan şeyler işbu eki şirketniñ faaliyeti netiсеsinde yüz berdi»,– qayd etti Paşayev.
O dey ki, zavodlarnıñ faaliyeti yarımada ekologiyasına menfiy tesir ete.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
