ATR qırımtatar telekanalınıñ baş müdiri, Qırım «vatandaşlıq» qamaçavınıñ teşebbüsçilerinden biri Lenur İslâmov Qırım.Aqiqat mühbirine Qırım rusiyeli akimiyetiniñ ondan ticaretini tutıp almaq kibi ıntıluvlarına olacaq cevabı aqqında tarif etti.
«Degenleri kibi, İslâmovdan er şeyni tutıp alacaqlar halqara instantsiyalar, halqara mahkemeler bar, aqlarımıznı qorçalaycaqmız. Şirketlerimni menden tutıp alacaq ve öz mülkiyetine keçirecek teşkilâtlarnıñ Avropada çalışmaq imkâniyetlerini blok etecegim. Davalarnı açacaq olsalar, bizim de öyle yapmağa imkânımız bar. Ğarp esaplarında paralarını blok etmek. Arz etmesinler… Qıtaiy Ukrainada Rusiye Federatsiyasınıñ bir sıra esabatı qaldı. Onıñ içün, bizni anda öyle «sevseler», biz olarnı mında, qıtada, «severmiz». İnansınlar, bunı yaparmız», – dey İslâmov.
Bunıñ ile o qoştı: «Muayyen sıñırdan keçmege de kerek olsa. Anda sıñırdan keçkenleri kibi. Oğlumnı bugün evimde sorğuğa çektiler. Olar: kamerağa baqıp, babañdan vazgeç, Qırım – Rusiye olğanını tanı, seni azat etermiz, aks alda – seni mağazğa alıp ketermiz…», – dey ediler, – tarif ete Qırım qamaçavınıñ teşebbüsçilerinden biri.
Lenur İslâmov şunı qayd etti ki, Qırımnıñ rusiyeli akimiyetiniñ tarafından böyle areketlerniñ olacağını beklegen edi ve Qırımda öz esaplarınıñ yoq olacağı aqqında tenbiyelerni alğan edi.
Saba noyabr 2 künü Qırımda ATR qırımtatar telekanalınıñ sabıq hadimleri – ATR telekanalınıñ muarriri olğan Lilâ Bucurova, sabıq baş müdiri Elzara İslâmovanıñ ve telekanal saibi Lenur İslâmov ana-babasınıñ, Moskvada yaşağan İslâmovnıñ tatası Lenaranıñ evlerinde tintüvler keçirildi.
Aynı şu künü Rusiye Merkeziy Bankı İslâmovğa ait «Just Bank» şirketiniñ litsenziyasınıñ qaytarılması aqqında malümatnı aşkâr ettti. Qırımtatar iş adamı Qırım.Aqiqatqa aytqanı kibi, işbu areketlerni Qırım qamaçavı ile bağlay.
Ukraina Tış işler nazirligi Qırımda insan aqlarınıñ bozuluvı boyunca eki cinaiy işni açtı.
Sentâbr 20 künü qırımtatarlarnıñ yetekçileri tarafından teşkil etilgen Qırımğa mal taşığan yük naqliyatınıñ qamaçavı başlandı.
