Qırımnıñ rusiyeli prokurorı Natalya Poklonskaya dey ki, Qırım qamaçavınıñ teşebbüsçileri Rusiye qanunları boyunca mesuliyetke çekilecek.
«Qırım «qamaçavını» teşkil etkenler, vatandaşlarımıznıñ aq ve serbestligine qarşı areket etkenler, devletimiz ve Qırım Cumhuriyetiniñ menfaatına qarşı faaliyet köstergenlerge ve qanuniyetni bozğanlarğa nisbeten mütenasip qararlar alınacaq – ve Lenur İslâmov istisna degil! Er kes qanuniyet boyunca mesuliyetke çekilecek!» – yaza Poklonskaya Facebookta noyabr 2 künü.
Saba noyabr 2 künü Qırımda ATR qırımtatar telekanalınıñ saibi Lenur İslâmov ana-babasınıñ evinde tintüv keçirildi. Moskvada yaşağan İsâlmovnıñ tatası Lenaranıñ evini de tinteyler.
Qırım uquq qoruyıcı organlarınıñ işbu sebepten resmiy izaatları şimdilik yoqtır.
Aynı zamanda, Qırımnıñ Devlet milletler komitetiniñ başı Zaur Smirnov RİA Krım neşirine aytqanı kibi, İslâmov «Rusiyege qarşı ekstremist faaliyeti içün cevap bermeli».
Rusiye Merkeziy bankı saytında ATR telekanalınıñ saibi, iş adamı Lenur İslâmovnıñ «Just Bank» şirketiniñ bank ameliyatlarınıñ keçirilmesine litsenziyanıñ qaytarılması aqqında malümat peyda oldı.
Şimdi İslâmov qıtaiy Ukrainada yaşay ve sentâbr 20 künü başlanğan Qırım qamaçavınıñ teşebbüsçilerinden biri ola.
