Qırım tintüvleri – ATR tekekanalınıñ saibi Lenur İslâmovnıñ ev ve şirketlerinde, telekanalnıñ sabıq hadimleriniñ evlerinde – Rusiye akimiyetiniñ Ukraina vatandaşlarına qarşı yapılğan nevbetteki «cezalav».
Bunı Ukraina Baş prokuraturası yanında QMC prokurorınıñ birinci muavini Nazar Holodnitskiy Qırım.Aqiqatqa bildirdi.
«Vatandaşlarımıznı cezalamaq içün nevbetteki ıntıluvdır», – dey o.
Holodnitskiy dey ki, Rusiye uquq qoruyıcılarınıñ bu kibi areketleri Qırım qamaçavı boyunca vatandaşlıq aktsiyasınıñ «müsbet aqibetleri» bar olğanını tasdiqlay. Holodnitskiy degeni kibi, qamaçav «işğalcilerni öz kelecegi içün kerçekten de qasevet çekmege mecbur ete».
Onıñ fikrine köre, Qırım vaqiaları «yarımadanıñ işğalden azat etilmesine aqiqiy areketleri ile» qoşulğanlarğa qarşı «miqyaslı aktsiya»nıñ alıp barılmasını köstere.
«Qorquzuv, qanunsız tintüvler. Vatanperver grajdanlarımıznı qorquzmaq içün yapıla», – dey Holodnitskiy.
Saba noyabr 2 künü Qırımda ATR qırımtatar telekanalınıñ saibi Lenur İslâmov ana-babasınıñ evinde tintüv keçirildi. Moskvada yaşağan İsâlmovnıñ tatası Lenaranıñ evini de tinteyler.
Qırım uquq qoruyıcı organlarınıñ işbu sebepten resmiy izaatları şimdilik yoqtır.
Aynı zamanda, Qırımnıñ Devlet milletler komitetiniñ başı Zaur Smirnov RİA Krım neşirine aytqanı kibi, İslâmov «Rusiyege qarşı ekstremist faaliyeti içün cevap bermeli».
Rusiye Merkeziy bankı saytında ATR telekanalınıñ saibi, iş adamı Lenur İslâmovnıñ «Just Bank» şirketiniñ bank ameliyatlarınıñ keçirilmesine litsenziyanıñ qaytarılması aqqında malümat peyda oldı.
Şimdi İslâmov qıtaiy Ukrainada yaşay ve sentâbr 20 künü başlanğan Qırım qamaçavınıñ teşebbüsçilerinden biri ola.
