Qırımtatar Milliy Meclisiniñ reisi muavini İlmi Umerov dey ki, Qırımda ticaret ile yalıñız Rusiye akimiyetine riayetkâr olğanlar ile oğraşa bile.
Böylece o ATR telekanalınıñ saibine ait olğan şirketlerdeki tintüvlerni izaatladı.
«Esas maqsat – ziyade qorquzmaqtır. Rusiyede er kes qorqu içinde yaşamaq kerek. Başqace tüşünmek ya da riayet etmemek – mümkün olmağan «itişam»dır. Ticaret ile oğraşmaq ve inkişaf emtek – «riayetkâr»larnıñ fırsatıdır.
FSB ve Rusiye qorquzuv taktikasını qullanıp, Qırımdan daa da çoq insannı quvmağa tırışa»,– yaza o Facebookta.
«Eminim, qırımtatar halqına ileride de Qırımda Rusiye qanuniyetini tanımamaq içün sabır ve idraq yeter, Ukraina terkibinde qırımtatar muhtar cumhuriyeti içün küreş ise devam etecek...», – dey o.
Saba noyabr 2 künü Qırımda ATR qırımtatar telekanalınıñ saibi Lenur İslâmov ana-babasınıñ evinde tintüv keçirildi. Moskvada yaşağan İsâlmovnıñ tatası Lenaranıñ evini de tinteyler.
Qırım uquq qoruyıcı organlarınıñ işbu sebepten resmiy izaatları şimdilik yoqtır.
Aynı zamanda, Qırımnıñ Devlet milletler komitetiniñ başı Zaur Smirnov RİA Krım neşirine aytqanı kibi, İslâmov «Rusiyege qarşı ekstremist faaliyeti içün cevap bermeli».
Rusiye Merkeziy bankı saytında ATR telekanalınıñ saibi, iş adamı Lenur İslâmovnıñ «Just Bank» şirketiniñ bank ameliyatlarınıñ keçirilmesine litsenziyanıñ qaytarılması aqqında malümat peyda oldı.
Şimdi İslâmov qıtaiy Ukrainada yaşay ve sentâbr 20 künü başlanğan Qırım qamaçavınıñ teşebbüsçilerinden biri ola.
