Qırımnıñ rusiyeli başı Sergey Aksenov ATR qırımtatar telekanalınıñ saibi Lenur İslâmovğa nisbeten Rusiye mahsus hızmetleriniñ areketlerini aqladı. Onıñ fikrine köre, bu İslâmovnıñ Qırımğa qıtaiy Ukrainadan mal ve elektrik energiyasınıñ ketirilmesini blok etmek çağıruvlarına «adaletli» cevap.
«Qırımnıñ İslâmov tarafından idare etilgen «qamaçavı» oña Qırımda ticaretni alıp barmağa keder etmey edi. Alem-aşkâre köstergen Rusiyege nefreti oña Rusiye vatandaşı olmağa keder etmey», – yazdı Aksenov Facebookta.
«İslâmov qırımlılarnı açlıqqa oğratmağa, suv, elektrika, zaruriy mahsulatsız qaldırmağa çağıra ve aynı zamanda cebini toldurmaq içün Qırımda aqça qazana. Alçaqlıq ve ruyakârlıqtır. Uquq qoruyıcı organlarnıñ areketleri – adaletniñ ğayrıdan tiklenmesidir», – dey o.
Saba noyabr 2 künü Qırımda ATR qırımtatar telekanalınıñ sabıq hadimleri – ATR telekanalınıñ muarriri olğan Lilâ Bucurova, sabıq baş müdiri Elzara İslâmovanıñ ve telekanal saibi Lenur İslâmov ana-babasınıñ evlerinde tintüvler keçirildi. Moskvada yaşağan İsâlmovnıñ tatası Lenaranıñ evini de tinteyler.
Qırım uquq qoruyıcı organlarınıñ işbu sebepten resmiy izaatları şimdilik yoqtır.
Aynı zamanda, Qırımnıñ Devlet milletler komitetiniñ başı Zaur Smirnov RİA Krım neşirine aytqanı kibi, İslâmov «Rusiyege qarşı ekstremist faaliyeti içün cevap bermeli».
Rusiye Merkeziy bankı saytında ATR telekanalınıñ saibi, iş adamı Lenur İslâmovnıñ «Just Bank» şirketiniñ bank ameliyatlarınıñ keçirilmesine litsenziyanıñ qaytarılması aqqında malümat peyda oldı.
Şimdi İslâmov qıtaiy Ukrainada yaşay ve sentâbr 20 künü başlanğan Qırım qamaçavınıñ teşebbüsçilerinden biri ola.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
