Link açıqlığı

Aqmescitte Rusiye FSB hadimleri ATR qırımtatar telekanalında tintüv keçire. Bu aqta Qırım.Aqiqatqa telekanalnıñ saibi Lenur İslâmov bildirdi.

«Moskva şirketlerimde «maski-show», SimSitiTransta «maski-show», , Qırımda ATR telekanalında tintüv keçirile», – dey o.

İslâmovnıñ aytqanı kibi, şimdi ATR telekanalınıñ sabıq muarriri Lilâ Bucurova ile bağ qurıp olamaylar. Onıñ evinde tintüv endi keçirildi. «Тehnikanı, elektron taşıyıcılarnı, telefonnı tutıp aldılar», – dey o.

Bunıñ ile, aytqanı kibi, telekanalnıñ sabıq baş müdiri Elzara İslâmova ile de bağ yoq. Onıñ evinde de noyabr 2 künü tintüv keçirildi. Şimdilik, İslâmovnıñ aytqanına binayen, tintüv tatası Lenaranıñ evinde devam ete.

İslâmovnıñ sözlerine köre, o ana-babası ile telefon vastası ile bağlandı.

Babamnen laf etim. Babama madde bile köstermediler: «Oğluñıznı tenbiyeleñiz» dep ayttılar. Babam davalaşmadı, 82 yaşındadır. Ana-babama tintüvge sebep olğan maddeni bile köstermediler. Evni darma-dağın etip kettiler», – dey telekanal saibi.

Qırım qamaçavınıñ teşebbüsçilerinden biri olğan İslâmov FSB areketlerini öz siyasiy faaliyeti ile bağlay: «Meni tenbiyeley ediler: «Ya er şeyni toqtatasıñ, ya senden er şeyni tutıp alamız» degen ediler. Bunı yapalar. Öz yüzüni köstereler.

Biz kimseden bir şey almaymız. Aqlarımıznı qorumağa tırışamız. Vatanımıznı yabancı asker zapt etti».

İslâmov dey ki, Qırımda keçirilgen tintüvler qanunsızdır, «çünki bu Ukraina territoriyasıdır ve bu topraqta olar tintüvlerni keçirip olamaylar».

Saba noyabr 2 künü Qırımda ATR qırımtatar telekanalınıñ sabıq hadimleri – ATR telekanalınıñ muarriri olğan Lilâ Bucurova, sabıq baş müdiri Elzara İslâmovanıñ ve telekanal saibi Lenur İslâmov ana-babasınıñ evlerinde tintüvler keçirildi. Moskvada yaşağan İsâlmovnıñ tatası Lenaranıñ evini de tinteyler.

Qırım uquq qoruyıcı organlarınıñ işbu sebepten resmiy izaatları şimdilik yoqtır.
Aynı zamanda, Qırımnıñ Devlet milletler komitetiniñ başı Zaur Smirnov RİA Krım neşirine aytqanı kibi, İslâmov «Rusiyege qarşı ekstremist faaliyeti içün cevap bermeli».

İslâmovnıñ fikrine köre, işbu areketler – onıñ Kremlge qarşı mevamınıñ neticesi ve onıñ tarafından teşkil etilgen Qırım qamaçavına cevaptır.

Rusiye Merkeziy bankı saytında ATR telekanalınıñ saibi, iş adamı Lenur İslâmovnıñ «Just Bank» şirketiniñ bank ameliyatlarınıñ keçirilmesine litsenziyanıñ qaytarılması aqqında malümat peyda oldı.

Şimdi İslâmov qıtaiy Ukrainada yaşay ve sentâbr 20 künü başlanğan Qırım qamaçavınıñ teşebbüsçilerinden biri ola.

Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.

XS
SM
MD
LG