Qırımtatar Milliy Meclisiniñ reisi, Ukraina Yuqarı Radasınıñ deputatı Refat Çubarov oktâbr 28-de Facebook saifesinde Aqmescitniñ Kiyev rayon mahkemesi çıqarğan qararnı yerleştirdi. Oña binaen, Meclis reisi ğıyabiy şekilde apiske alına.
Aqmescitniñ Kiyev rayon mahkemesi 2015 senesi oktâbr 6-da çıqarğan qararğa köre, men «Rusiye Federatsiyası Ceza Kodeksiniñ 280.1 maddesiniñ 2-nci qısmı belgilegen cinayet yapılmasında qabaatlanğan şahıs olaraq 2 ayğa qadar apiske alınacam»Refat Çubarov
«Aqmescitniñ Kiyev rayon mahkemesi 2015 senesi oktâbr 6-da çıqarğan qararğa köre, men «Rusiye Federatsiyası Ceza Kodeksiniñ 280.1 maddesiniñ 2-nci qısmı belgilegen cinayet yapılmasında qabaatlanğan şahıs olaraq 2 ayğa qadar apiske alınacam, mahkeme Rusiye Federatsiyasına ketirilmesi ya da Rusiye Federatsiyasında yaqalanmasına köre saymağa başlay. İşbu qararnıñ qabul etilmesiniñ sebebi Qırım ve Aqyar boyunca Rusiye Federal havfsızlıq hızmeti idaresiniñ Taqiqat bölügi mahkemege bergen muracaatı oldı», – dep yazdı Çubarov.
Qırımda mahkeme ve uquq qoruyıcı organları Çubarovnıñ ğıyabiy şekilde apiske alınması aqqında bildirmey.
Qırımnıñ Rusiye prokurorı Natalya Poklonskaya bildirdi ki, Qırımdaki Rusiye Federal havfsızlıq hızmeti idaresiniñ taqiqat bölügi Qırımtatar Milliy Meclisiniñ reisi Refat Çubarovğa qarşı cinaiy iş açtı.
Onıñ aytqanına köre, cinaiy işniñ sebebi devletniñ topraq bütünligini bozmaq çağıruvları oldı. Poklonskayanıñ qayd etkenine köre, cinaiy iş 280.1 maddesi boyunca (Rusiyeniñ topraq bütünligini bozacaq areketler yapılmasına çağıruv) açıldı.
Çubarovnıñ Rusiyege ve Rusiye işğal etken Qırımğa kirişi beş yılğa yasaq etildi.
