Link açıqlığı

Qırım ve Aqyar boyunca Rusiye FSB idaresiniñ taqiqat komiteti ATR telekanalınıñ saibi Lenur İslâmovğa nisbeten cinaiy işni açtı, dep bildire akimiyet tarafdarı «Krıminform» saytı.

«Taqiqat alıp barıla», – dep bildire idareniñ matbuat hızmeti ve cinaiy iş oktâbr 22 künü açılğanını qayd etti. Maddesi bildirilmey.

«RİA Novosti» Rusiye agentligi uquq qoruyıcı organlarğa esaslanıp, saba noyabr 2 künü İslâmovnıñ şirketlerinde tintüvler keçirilgenini bildire.

FSB ve Qırımda Rusiye Taqiqat komitetiniñ resmiy resurslarında bu aqta malümat yoq.

Evel noyabr 2 künü Qırımda ATR telekanalınıñ hadimleri, İslâmovnıñ ana-babasınıñ evinde ve Moskvadaki oğlu yaşağan evinde keçirilgen tintüvler aqqında bildirilgen edi.

Media-holdingge kirgen ATR, Lâle telekanalları, «Lider FM» radiosı kibi, «Meydan» radiostantsiyası da 2015 senesi aprel 1-de işğal etilgen Qırımda yayınlavını toqtattı. İyün 17-denATR ve Lâle Kiyevden işlemege başladı, «Meydan» radiosını internetten diñlemege mümkün oldı.

XS
SM
MD
LG