Qırım yaşları Rusiye toplulığına kerekli derecede qoşulmağan. Bu fikirni Qırım siyasetşınası, siyasiy munasebet regional institutınıñ prezidenti İvan Mezüho bildirdi.
«Qırımnıñ Rusiyege tarihiy qoşulmasından soñ çoq vaqıt keçmedi. Qırım ve Aqyar yaşlarınıñ Rusiye toplulığına alıştırılmasını tezleştirmege kerek olğanını tüşünem», – dey o.
Mezüho qayd etkeni kibi, yarımadanıñ faal gençlerine devlet yardımından ğayrı, yaşlar ile çalışmağa kerek: mektep talabelerinden yaş ocalarğace.
Onıñ sözlerine köre, Qırımda yaşağan gençler Rusiye aqqında çoqça bilmeli. «Yaşlarnıñ uquqiy savatlılığı seviyesini arttırmaq kerek», – dey ekspert.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
