Rusiye prezidenti Vladimir Putin ve Aqyarnıñ rusiyeli valisi Sergey Menâylo oktâbr 28 künü körüşip, bala bağçalarını ve olarda olğan yerlerniñ miqdarını muzakere ettiler.
Bu aqta Kremlniñ matbuat hızmeti bildire.
«Aqyarnıñ içtimaiy-iqtisadiy inkişafı ile bağlı aktual meseleler muzakere etildi. Vali prezidentni şeerniñ mektepten evel tasil müessiselerinde yerlerniñ teminlevi aqqında haberdar etti», – denile beyanatta.
Mında şunı da qayd ettiler ki, körüşüvde Qırımda hristianlıqnıñ tarihiy-medeniy merkeziniñ teşkil etilmesi muzakere etildi.
Şu cümleden, Putin Qırımnıñ soñki ziyareti vaqtında «dünyanıñ eñ büyük dininiñ bütün pıtaqlarını qaplaycaq» merkezni meydanğa ketirmege teklif etti.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay
