Herson vilâyeti Geniçesk rayonıñ sabıq başı, yarımadada Qırım akimiyetine yaqın olğan «Qırım birligi» qırımtatar teşkilâtınıñ reberi Seytumer Nimetullayev Herson vilâyetinde keçirilmesi planlaştırılğan Qırım qamaçavına qarşı aktsiyanıñ azırlanuvına öz alâqasını red etti.
Bunı o Qırım.Aqiqatqa bildirdi.
Aytqanı kibi, oña Geniçesk rayonınıñ sakinleri telefon etip, qamaçav iştirakçilerine şikâyet ete ve «tevsiye soraylar».
«Balalar anda çalışa ve ailelerini baqmağa tırışalar. Bu qamaçav siyasiy degil, iqtisadiydir, er kes öz aile menfaatını tüşüne. Çoqusınen telefonlaşamız, laf etemiz. Olarnıñ aytılacaq şeyleri bar. Olarğa şöyle aytıldı: barıñ, ariza yazıñ, aktsiyanı keçirmege istegiñizni bildiriñ. Añlağanıma köre, olar Geniçesk rayonınıñ memuriyetine barıp, izin aldılar. İnsanlar öz fikirlerini bildirmege isteyler. Menimce, bu adiy bir şey», – dedi o ve Qırım qamaçavı iştirakçileriniñ aqça berilmesi aqqında bildirüvini red etti.
«Kimse aqça bermedi. İnsanlar «Pravıy sektor»nıñ idare etken sıñır yanındaki zonada yaşamaqtan bezdiler. Gecelernen yürip, balalarnı qorquza ediler, evlerni, maşinalarnı yaqmağa vade ete ediler», – dey o.
Onıñ fikrine köre, ileride yerli eali arasında narazılıq aktsiyaları başlana bile.
«Olarğa fikirni aydınlatmağa yasaq etseler, yarın, o birisi kün halq narazılıqqa çıqar. Geniçesk çoq milletlidir ve kimse başqasınıñ itibarını aşalap olamaz», – dey Nimetullayev.
Herson vilâyetinde oktâbr 28 kününe planlaştırılğan Qırım qamaçavına qarşı aktsiyanı lâğu ettiler.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
