Herson vilâyetinde oktâbr 28 kününe planlaştırılğan Qırım qamaçavına qarşı aktsiyanı lâğu ettiler, deyler teşkilâtçılar. Olarnıñ sözlerine köre, bunı olarğa qarşı kelgen qorquzuvlardan sebep ettiler, haber ete Qırım.Aqiqat mühbiri.
Çarşenbe saba Herson vilâyetinden Novoalekseyevka-Canköy yolunda, «Çonğardan» 20 km uzaqlığında Qırım qamaçavına qarşı aktsiyanıñ iştirakçileri toplandı, şu cümleden onıñ teşkilâtçısı, Geniçesk sakini – taksi aydavcısı Zinoviy Nijnik. Onıñ sözlerine köre, oña yerli sakinler muracaat ettiler – Qırım qamaçavııñ iştirakçileri olarnı toqtatıp, maşinalarını teşkergenleri ile razı olmağan taksi aydavcıları.
Bunıñ ile o şunı bildirdi ki, Qırım qamaçavına qarşı aktsiyanı lâğu etmege mecbur oldıdar, çünki oña «Pravıy sektor» faalleri tarafından basqı etile edi. Nijnikniñ aytqanı kibi, onı ve aktsiya iştirakçilerini «beden cezalandıruvı ile qorquza ediler».
Erkekniñ sözlerine köre, aktsiyada 150 insannıñ iştirak etmesi planlaştırıla edi, amma çoqusı qorqıp, iştirakten vazgeçti.
İşbu aktsiya teşkilâtçısınıñ maşinasına Qırım qamaçavınıñ teşkilâtçıları keldi, şu cümleden ştab muavini İzet Gdanov, «Pravıy sektor» ve diger bölüklerniñ temsilcileri.
Olar erkekni onıñ «Geniçesk rayon memuriyetiniñ sabıq başı, şimdi yarımadada akimiyetke yaqın olğan qırımtatar teşkilâtlarından biriniñ reberi Seytumer Nimetullayev»niñ vazifelerini eda etkeninde qabaatladılar.
İzet Gdanov jurnalistlerge aytqanı kibi, Qırım qamaçavına qarşı aktsiya «Rusiye Federatsiyasınıñ qaideleri boyunca keçmek kerek edi», «separatist aktsiyası Ukraina topraq bütünliginiñ bozuluvına yönelgen».
Qırım qamaçavınıñ işitarkçileri ve teşkilâtçıları memuriy sıñır yanında davalaşmağa devam ete. Bunıñ ile, Qırım.Aqiqat mühbiri bildirgeni kibi, uquq qoruyıcılar mında yoq.
«Pravıy sektor» Nijnikniñ qorquzuvlar olğanı aqqında bildirüvini red ettiler.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
