Qırımnıñ vatandaşlıq qamaçavınıñ iştirakçileri yarımada ile memuriy sıñırda Eski Qırımnıñ sakini Оleg Pankovnı yaqaladılar. Olarnıñ aytqanına köre, o 2014 senesi mart ayındaki referendumnıñ saylav komissiyasınıñ reisi edi. Bunı Qırım.Aqiqat mühbirine qamaçav işitrakçilerinden biri, «Azov» batalyonınıñ temsilcisi tarif etti.
Qırım.Aqiqatnıñ subetdeşi aytqanı kibi, Pankov evel ukrain ordusında hızmet etken edi, Qırım işğalinden soñ ise «DHC» tarafında cenkleşti. Pankov Qırımğa avtobus vastası ile kirecek edi.
«Azov» askerleri yaqalanğan şahısnı Ukraina havfsızlıq hızmetine teslim ettiler, onı, ilk malümatqa köre, Hersonğa alıp kettiler.
Herson vilâyetinde Ukraina İçki işler nazirliginiñ Baş idaresinde Qırım.Aqiqatqa işbu malümatnı tasdiqladılar, amma tafsilâtlı malümatnı aydınlatmadılar.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
