Ukraina Haber siyaseti naziri Yuriy Stets Qırımnıñ haber siyaseti meselelerinden yañı keñeşçisini tayinledi. Nazirlikniñ matbuat hızmeti bildirgeni kibi, şu vazifege jurnalist, prodüser, qırımtatar halqınñı işlerinden cеmaat erbabı Emine Ceppar keçti.
«Tayinlev aqqında qarar Ukraina prezidentiniñ qırımtatar halqınıñ işlerinden vekâletlisi Mustafa Cemilevniñ tevsiyesi esasında alındı», – denile beyanatta.
Yuriy Stets bildirgeni kibi, Emine Cepparnıñ vazifeleri arasında – Qırımda söz serbestliginiñ sıñırlavını toqtatmaq ve Qırım haber alanında ukrain matbuat vastalarınıñ tartqatılmasına yollarnı tapmaqtır.
Bundan evel Qırım haber siyaseti meselelerinden nazir keñeşçisi Sergey Kostinskiy edi, onı 2015 senesi sentâbr 14 künü Ukrainanıñ telekorüv ve radioyayınlav meselelerinden Ukraina Milliy şurasınıñ azası oldı.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
