Kiyevniñ Ebediy şüret bağçasında qırımtatar halqınıñ ulu oğlu, uçucı-sınavcı Amet-Han Sultan abidesine gülçemberlerni qoyuv tedbiri keçti, haber ete QHA.
Tedbirde qırımtatar halqınıñ yetekçisi Mustafa Cemilev ve Qırımtatar Milliy Meclisiniñ reisi Refat Çubarov iştirak ettiler.
Ukraina halq deputatı Refat Çubarov Amet-Han Sultannıñ insaniy çizgilerini qayd etti.
«Cebede cesür, ve ekinci cian cenkinden soñ qırımtatar halqı sürgün etilgende cesür edi. Onı satın almağa tırışa ediler, milletni deñiştirmege talap ete ediler. Öz halqı ile er vaqıt olacağından emin edi. Amet-Han Sultan qırımtatar halqınıñ iştirakçilerinden biri edi. Arizalarnı imzalay, akimiyetke qırımtatar eyyetleri ile bara ve halqınıñ Vatanğa avdetini talap ete edi. Aynı şu sebepten onı qırımtatarlar ürmet eteler», – dedi Çubarov.
«Haytarma» filminde Amet-Han Sultan rolüni icra etken aktör Ahtem Seytablayev qaramannıñ aile ve halqına sevgisini qayd etti.
«Haytarma» filmine azırlıq körgende komandamız ile çoq malümat oqudıq. Olğan bütün malümatnı: vesiqalı, arhiv, tercimeialnı, Amet-Han Sultannıñ dostları ve zenaatdaşlarınıñ hatırlavları. Özümiz içün bazı şeylerni qayd ettik – canlı insan olğanını istey edik. Ana-babasını sevgen, yaşağan toprağını sevgen. Onıñ içinde bu er şey bar edi», – dey Seytablayev.
Sovetlerniñ uçucısı Amet-Han Sultan 603 cenk uçuşını yaptı, 30 uçaqnı şahsen ve 19 uçaqnı taqım içinde qırdı. Yaz işi devamında uçucı 100 uçuş vastasını ögrendi. 1971 senesi fevral 1-de Amet-Han Sultan Tu-16 uçuş laboratoriyasında sınav uçuşında elâk oldı. Moskvada defn etilgen edi.
