Link açıqlığı

Qırımtatar Milliy Meclisiniñ reisi Refat Çubarov dey ki, Qırımnıñ vatandaşlıq qamaçavı boyunca aktsiya «Qırım meselesini» al etmege yardım eter.

«Qamaçav mevzunıñ aktualleştirilüvine imkân yarata ve bütün taraflarğa çıqışlarnı qıdırmağa yardım ete», – dedi o ATR telekanalınıñ canlı efirinde, cumaertesi, oktâbr 24 künü, haber ete Qırım.Aqiqat mühbiri.

Çubarovnıñ sözlerine köre, qamaçav mevzusını halqara seviyede muzakere ete, neticede Qırımda halqara eyyet temsilcileriniñ bulunması mümkün. «Söz Qırımda halqara eyyet temsilcileriniñ bulunması aqqında kete», – dey Meсlis reisi ve Qırımda insan aqlarınıñ bozuluvı ve ayırımlarnıñ devam etkenini bildire.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

XS
SM
MD
LG