Qırımtatar Milliy Meclisi Qırımda ya da Rusiyede qanunsız areketlerni etmey, dedi Qırımtatar Milliy Meclisi reisiniñ birinci muavini Nariman Celâl.
Böyleliknen o Qırım.Aqiqatqa Rusiye Federatsiyası Cemaat palatasınıñ Rusiye baş prokurorına Qırım Meclisini ekstremizmge teşkermege ricasını izaatladı.
Muracaatta Qırım qamaçavında iştirak etken «Pravıy sektor» temsilcileriniñ Qırım ile memuriy sıñırda yük naqliyatına etken «ücümleri» ve yarımadanıñ «energetik» qamaçavı boyunca olğan niyetleri qayd etile.
«Meclisniñ Qırım azalarınıñ Qırım qamaçavına alâqası yoq. Qamaçavnı bugün qıtaiy Ukrainada bulunmağa mecbur olğаn Meclisniñ qısmı teşkil etti. Qamaçav da Ukraina toprağında keçirile», – dey Celâl.
Bunıñ ile o şunı da qayd etti ki, şimdilik Herson vilâyetinde Qırım ile memuriy sıñırda «qanun bozuluvları yüz bergenini» kimse tasdiqlamadı.
Meclis reisiniñ muavini Qırımtatar Milliy Meclisi tarafına Rusiye akimiyetiniñ «qabaatı» qanunsız olğanını qayd etti.
«Fevral 26» işiniñ taqiqatı bile şunı tasdiqlay ki, yani Rusiye akimiyetine bir şey keder etmey, insanlarnı diger devletlerde yapılğan adise, areketler sebebinden cezalamağa isteseler, cezalaylar. Mında da aynı şusı. Qamaçav Rusiye içün zarar ketirmeycegini aytsalar, oña öyle diqqat ayırmağa kerekmi?», – dey o.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Oktâbr ayında, faallerniñ aytqanı kibi, yarımadanıñ «energetik» qamaçavı da başlandı.
