Aqmescitte «Qırım baari» soqağı peyda oldı. İşbu qarar oktâbr 22 künü Aqmescitniñ şeer şurasınıñ nevbetteki sessiyasında qabul etildi, dep bildire şeerniñ rusiyeli memuriyetiniñ matbuat hızmeti.
«Daçnaya soqağı rayonında yerleşken soqaq 2014 senesi baar vaqiaları ve yarımadanıñ Rusiye terkibine qoşuluvı şerefine adlandırılacaq», – denile beyanatta.
Deputatlar Aqmescit memuriyetiniñ Bespalova soqağı rayonında yerleşken 12 yañı şeer soqaqlarına adlarnıñ berilmesi aqta teşebbüsine qol tuttılar. Bu soqaqlarğa İvan Kupala, Paporotnikova, Simurg ve Mermerş adları berildi. Jasminovaya, İzumrudnaya, Jemçujnaya, Eridan, Ayaz, Nariman Bekirov ve Edem Nalbantov soqaqları peyda olacaq.
2015 senesi fevral ayında Qırım akimiyeti 2014 senesi fevral 26 vaqialarınıñ yıllığına bağışlanğan hatıra tahtasını açtılar.
Ukraina Yuqarı Şurası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq ilân etti. 2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
