Link açıqlığı

Ukraina prezidentiniñ qırımtatar halqınıñ işlerinden vekâletlisi, halq deputatı Mustafa Cemilev aytqanı kibi, 2014 senesi aprel ayında qabul etilgen «Milliy mensüplik boyunca sürgün etilgen şahıslarnıñ aqlarınıñ ğayrıdan tiklevi» aqqında qanun amelde qullanılmay.

Vekâletliniñ matbuat hızmeti Facebookta deñev malümatını aşkâr etti – ofis hadimlerinden biri sürgün etilgenniñ statusını elde etmege çalıştı. Deñev bu sene yaz ayından devam ete.

«Üç ay keçti. İçtimaiy siyaset nazirligi hadimimizniñ adından qayd etilgen ariza boyunca müsbet qararnı qabul etti. Amma, buña baqmadan, emek ve içtimaiy qoruv idaresine şeadetname blankı berilmedi. Şunıñ içün şeadetnameni elde etip olamadıq. Daa bir ay keçti – şeadetname yoq. Bizge bildirilgeni kibi, şeadetnamelerniñ mütenasip blankları daa azır degil», – denile beyanatta.

Cemilevniñ matbuat hızmeti bildirgeni kibi, devlet bücetinde şeadetnamelerniñ azırlanuvına para ayırğan edi.

Qanunğa köre, Ukraina İçtimaiy siyaset nazirligi vatandaşqa milliy mensüplik boyunca sürgün olunğanı aqqında şeadetnameni bermek içün, arizanıñ yazılğanından soñ, üç ay berile.

«Sual açıq qala, ne içün bu ketişat o qadar qıyın? Milliy mensüplik boyunca sürgün etilgen şahıslarnıñ aqlarınıñ ğayrıdan tiklevi aqqında qanunnıñ qabul etilmesinden endi bir buçuq yıl keçti», – dedi qanun müellifi Mustafa Cemilev.

O bu sebepten mütenasip strukturalarğa muracaat etecekmi, belgisiz.

XS
SM
MD
LG