Qabul etilecek bücette Ukrainanıñ mudafaa ve havfsızlığına masraflar qısqartılamaz, çünki Rusiyeniñ arbiy küçü arta, dedi Ukraina milliy havfsızlıq ve mudafaa şurasınıñ kâtibi Oleksandr Turçinov.
«Vazifemiz – istilâcığa cevap bermek içün azır olmaq ve zapt etilgen topraqlarnı azat etmek, şunıñ içün ordumıznı zemaneviy silâ ve tehnika ile, arbiylerimizni – lâyıq aylıq ile teminlemek kerekmiz», – dep bildire Turçinovnıñ sözlerini Ukraina milliy havfsızlıq ve mudafaa şurasınıñ matbuat hızmeti.
Onıñ sözlerine köre, Rusiyeniñ öz arbiy bücetini daa dört milliard dollarğa arttırmaq niyeti Rusiye yolbaşçılığı öz istilâiy siyasetini toqtamaycağını tasdiqlay.
İqtisadiy buhran ve Rusiye ealisiniñ fuqareleşüvi fonunda arbiy bücetniñ 48 milliard dollarğa arttırılması «Putin Rusiyeni global arbiy telükege» çevirmege devam etkenini tasdiqlay, dey Turçinov.
O şunı da bildirdi ki, Nazirler kabineti tarafından bücetniñ esas noqtaları belgilense, Ukraina milliy havfsızlıq ve mudafaa şurası mudafaa bücetini belgiler.
2015 senesi Ukraina Silâlı quvetlerine 45 milliard grivna ayırılğan edi.
