Oktâbr 21 künü Konrad Adenauer Fondu Berlinde Rusiye tarafından işğal etilgen Qırımda insan aqları ile bağlı vaziyetni muzakeresin keçire.
Tedbirniñ programmasına binayen, yarımadada qırımtatarlarnıñ vaziyeti ve aqlarına riayet etilmesini muzakere etecekler. Davet etilgenler arasında – Qırımtatar Milliy Meclisiniñ reisi Refat Çubarov, ukrain ve rus uquq qoruydıjıları, halqara ekspertler.
Munaqaşa çarşenbe künü aqşam başlanacaq.
Uquq qoruyıcılarnıñ soñki esabatlarına köre, Qırımda qırımtatar halqınıñ temsilcilerine nisbeten repressiyalar devam etmekte.Qırımtatar Milliy Meclisiniñ reberligi bildirgeni kibi, Rusiye Qırımnı işğal etkeninden soñ, qırımtatarlar «genotsidniñ yañı variantını yaşamağa» mecbur.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
