Link açıqlığı

Kоreizde belgisiz şahıslar 1944 senesi Stalin sürgünligi qurbanlarınıñ hatırasına qoyulğan tahtanı sarı boya ile aramladılar.

Qırım.Aqiqatqa yerli sakinler aytqanı kibi, vaqia gece yüz berdi.

«Saba saat 9-da yerli sakinler tahtanıñ üstüne boya tökülgenini kördiler. Boyanı silmege istegen kommunal hızmetlerniñ hadimleri endi mında edi», – dedi şaatlardan biri.

O dey ki, yerli akimiyet meseleni, «artqaç şamata olmadan», çezmege istedi. Amma yerli sakinler bunı etmege bermediler ve militsiyanı çağırmağa talap ettiler.

Uquq qoruyıcılar memorialnıñ aramlanuvını qayd ettiler. Vandalizm boyunca iş açılacaqmı, belgisiz.

Uquq qoruyıcılarnıñ işbu vaqia boyunca resmiy izaatı yoqtır.

Yarımadada qırımtatarlarnıñ obyektleri ve muqaddes yerlerine nisbeten vandalizm sıq rastkelgen aldır. Qırımtatar Milliy Qurultayınıñ Merkeziy saylav komissiyasınıñ reisi Zair Smedlâyevniñ malümatına köre, yarımadada camilerni ateşke bergen şahıslar eki yıl içinde alâ tapılmağan.

XS
SM
MD
LG