Link açıqlığı

Kiyevde yaşağan qırımtatarı Qırımnıñ «vatandaşlıq» qamaçavı iştirakçisine bir 50 kub odun ketirdi.

Bunı Qırım.Aqiqat mühbirine Qırım ile memuriy sıñırda «Çonğar» kiriş noqtası yanında keçirilgen qamaçav territoriyasındaki çadır şeerçiginiñ komendantı Dilâver Seytumerov bildirdi.

«Odunlar bite edi. Sağ oluñız, Eskender ağa», – dedi Seytumerov.

Aytqanı kibi, faaller qışta mında qalmaq niyetindeler: çadırlarda qızdırğıçlar qoyulacaq, aşhane isitilecek.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Oktâbr ayında, faallerniñ aytqanı kibi, yarımadanıñ «energetik» qamaçavı da başlandı. Qırımğa elektroenergiyanı bergen tiremelerniñ bozuluvı qayd etildi. Millitsiya mezkür vaqialar boyunca cinaiy işlerni açtı, amma daa kimseni yaqalamadılar.

XS
SM
MD
LG