Link açıqlığı

Ukraina prezidentiniñ qırımtatar halqınıñ işlerinden vekâletlisi Mustafa Cemilev emindir, Rusiye öz medeniy asabalığı cedveline kirsetken Qırımnıñ tarihiy obyektleri Ukrainağa qaytarılacaq.

«Rusiye Federatsiyasınıñ ükümeti oktâbr 20 künü Qırımnıñ tarihiy obyektlerini onıñ medeniy asabalığına qoşqan qararnı qabul etti… Rusiyeniñ bu kibi areketleri XVII asır zapt eticilerine ait», – dep bildire vekâletliniñ matbuat hızmeti.

Cemilev dey ki, «tarihiy obyektlerni zapt etip» Rusiye Qırımnıñ tarihiy inşaatlarını UNESKO asabalığı sırasına kirsetken Ukrainanıñ ve qırımtatarlarnıñ ğayretini yoq ete.

«Rusiye Qırımnıñ medeniyet obyektlerine büyük zarar ketire. Amma alsınlar, ertemi-keçmi keri qaytaracaq, şunıñ içün bu kibi areketler biz içün pek müim degil», – dedi Cemilev.

Qırım ve Aqyar toprağında 200-den ziyade tarih obyekti oktâbr 20 künü Rusiye baş naziri Dmitriy Medvedevniñ fermanı ile federal emiyeti olğan medeniy obyektlerge qoşuldı.

Ukraina Tış işler nazirligi ve Medeniyet nazirligi bu areketlerge qarşılığını bildirdi ve halqara toplulıqnı «Rusiye Federatsiyasınıñ Ukraina medeniy asabalığını elge keçirmek ıntıluvlarını takbih etmege» çağırdı.

XS
SM
MD
LG