Link açıqlığı

Aqmescitte Qırımtatar Milliy Meclisi binasında Ukraina bayrağı yerli akimiyetniñ qozğaltıcısı edi, çünki «yarımadanıñ Rusiye işğaline qarşılıqnı» temsil ete edi, deу Riza Şevkiyev – «Qırım» Fondu» hayriye teşkilâtınıñ başı.

Bunı Şevkiyev oktâbr 21 künü Qırım.Aqiqat Radiosınıñ saba efirinde bildirdi.

«Anda (Qırımda – QA) sekiz ay devamında bizimkiden (Meclis binası üstünde – QA) ğayrı ukrain bayraqları yoq edi. Şeerniñ keçit qısmıdır ve maşinalar, aydavcılar, yolcular bu bayraqnı köre edi. İşğalge qarşılıq timsali edi. Ebet, o (akimiyet – QA) onı tüşürecek edi», – dey Şevkiyev.

Onıñ sözlerine köre, bu yarımadanıñ Rusiye akimiyeti tarafından Meclis ve «Qırım» Fondu»na nisbeten etilgen zulumnıñ sebeplerinden biridir. Neticede teşkilâtnıñ mülkiyeti, şu cümleden Aqmescitte Meclis binası da tutıp alınğan edi.

2014 senesi sentâbr ayında Aqmescitte belgisiz şahıslar Meclis binasından Ukraina bayrağını qoparıp alğan edi. 2015 senesi yazda bir qaç kere qırımtatar milliy bayrağını qoparğan ediler.

Qırımnıñ Rusiye akimiyeti Meclisni Aqmescitte Şmidta soqağı boyunca yerleşken «Qırım» Fondu» binasından quvdı. Binanıñ kimge ait olğanı aqta mesele alâ daa mahkemelerde baqıla.

Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.

XS
SM
MD
LG