Canköyde Qırımtatar Milliy Meclisiniñ merkeziy organı Qırımnıñ Qurman, Krasnoperekopsk, Cürçi, Canköy rayonlarınıñ regional Meclisleriniñ reisleri ile körüşti. Mında qırımtatarlarnıñ yarımadadaki vaziyetini muzakere ettiler.
«Qırımtatarlar içün vaziyet deñişmey fenadır. E, insanlar alışa, iradelerine qarşı tüşken şaraitlerge uymağa tırışa, amma regionаl Meclislerniñ reisleri öz nevbetinde er şeyden haberdar olması üzerinde çalışamız. Şu cümleden, ekinci vatandaşlıqnıñ olması aqqında mıtlaq bildirilmesi ile bağlı mesele boyunca regional Meclislerniñ reislerine adliyecilerimizniñ mesleatlarını bildirmege areket etemiz. Er bir qırımtatarı akimiyet tarafından azırlanılğan «sürprizlerge» azır olmalı», – dey Nariman Celâl.
Bunıñ ile, aytqanı kibi, Meclis er vaqıt qırımtatarlarğa muracaat etip, insan aqlarınıñ bozuluvı aqqında haber etmege çağıra.
«Qırımtatarlar Qırımda insan aqları ve qırımtatarlarnıñ aqları bozuluvına qarşılıq köstere bilmeleri içün elimizden kelgenini yapmalımız. Esas çağıruvımız – iç bir şeyge baqmadan Qırımda qalmaqtır», – qayd etti Celâl.
2014 senesi mart 20 künü Yuqarı Rada qırımtatarlarnı Qırımnıñ tamır halqı olaraq tanıdı. Buña 283 deputat qol tuttı.
Qırım ve Aqyar Rusiye tarafından 2014 senesi fevral 20 künü işğal etildi. Ukraina Yuqarı Şurası işbu künni işğalniñ başlanuv tarihı olaraq belgiledi.
