Siyasetşınas, Ukraina Tış işler nazirliginiñ haber departamentiniñ sabıq müdiri Oleg Voloşin dey ki, qırımtatar muhtariyeti olmadan Qırımnıñ Ukrainağa qaytaruv stsenariyi, imkânsızdır. O emindir, Ukraina «yarımadadan Rusiyeni quvacaq olsa», qırımtatarlarğa qol tutmalı.
Bunı o Qırım.Aqiqat Radiosınıñ efirinde bildirdi.
«Anda işğalden kim çekişe, bu topraqqa tarihiy aqları olğan muayyen halq, onıñ içün bu topraq ömür şaraitidir. Qırımtatarlarğa qol tutmalımız, Rusiyeni Qırımdan quvmağa istesek, amma bunıñ ile Qırımnıñ mustaqilligi ve qırımtatar cumhuriyeti aqqında aytmamalımız. Ebet, bu da bir variant degil. Eñ azından, keñ muhtariyet olmalı», – dey Voloşin.
Qırımtatarlarnıñ yetekçileri yañı Anayasada Qırımnıñ milliy-territorial muhtariyeti statusınıñ olmasını talap eteler.
