Ukraina Milliy ilimler akademiyasınıñ dünya iqtisadiyatı ve halqara munasebetleri merkeziniñ energetik programmalarınıñ müdiri Valentin Zemlânskiy dey ki, yarımadağa elektrika berilmesini toqtatmaq içün iç bir uquqiy sebep yoq ve Ukraina prezidenti buña razı olmaz.
Bunı o Qırım.Aqiqatqa bildirdi.
«Keliñiz, Qırım ile «sıñırda» faallerniñ ve silâlı teşkilâtlarnıñ areketlerini devlet qararı ile adaştırmayıq. Aqibetleri çeşit olacaq: arbitraj, mahkemeler. «İnter RAO» ile Qırımğa elektrik energiyasınıñ berilmesi aqta añlaşmalarımız bar. Olarnı bozmaq içün bugün sebep yoq», – dep qayd etti Zemlânskiy.
Ekspert dey ki, Ukraina, bundan da ğayrı, Energetik seneti altında imza qoydı, oña köre, elektrotaşıyıclarnıñ keçmesine keder etemez. Zemlânskiy aytqanı kibi, eger de Kiyev Qırımğa elektrikanıñ berilmesini toqtatsa, işbu senetniñ qaideleri bozulacaq. Bu sebepten, onıñ tahminlerine köre, prezident qamaç aqta soravnı red eter.
Qırımnıñ energetik qamaçavı aqqında elektron ariza altında 25 biñ insan qol qoydı. On kün içinde Petro Poroşenko işbu muracaatnı baqmalı ve oña cevap bermeli.
Qırımnıñ «energetik» qamaçavı aqqında talapnı qıtaiy Ukrainadan Qırımğa yük maşinalarınıñ kirsetilmemesi boyunca aktsiya iştirakçileri de bildirgen ediler.
