Herson vilâyetinde, Çonğar köyü yanında, belgisiz şahıslar elektrik tiremeleri tübüne bir qaç minaatıcı minanı qoydı, bazı soyları patladı.
Qırım.Aqiqat mühbiri bildirgeni kibi, uquq qoruyıcılarnıñ malümatına köre, belgisiz şahıslar dört minanı qoydı, eki danesi patladı. Melitopol-Canköy elektroberici yolağınıñ eki tiremesi bozuldı.
İşbu malümatnı Qırım.Aqiqatqa Hersonnıñ fevqulâde işleri boyunca hızmetinde tasdiqladılar, amma tafsilâtlıca bir şey aytmadılar. «Yaşayış havfı yoq», – deyler hızmetniñ idaresinde.
Vaqia yerinde militsiya hadimleri ve qurtarıcılar çalışa. Patlamağan minalarnı zararsız alğa ketirecek İçki işler nazirliginiñ hadimlerini bekleyler.
Militsiya birazdan tafsilâtlı malümatnı bermege vade ete.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
