Link açıqlığı

Siyasetşınas: Qırımnıñ yaqın kelecekte Ukrainağa qaytaruvı boyunca mehanizm şimdilik yoqtır


Siyasetşınas, Ukraina Tış işler nazirliginiñ haber departamentiniñ sabıq müdiri Oleg Voloşin aytqanı kibi, yaqın kelecekte Ukraina nezaretine Rusiye tarafından işğal etilgen Qırmını qaytarmağa yardım etecek mehanizm yoqtır.

Bunı o oktâbr 20 künü Qırım.Aqiqat Radiosınıñ saba efirinde bildirdi.

Onıñ fikrine köre, Ukrainanıñ BMT Havfsızlıq şurasındaki azalığı Qırım meselesini al etmege imkân berecegi aqqında bildirüv yañlıştır.

«Ukraina vatandaşlarını kene de aldatalar, çünki Ukrainanıñ BMT Havfsızlıq şurasındaki azalığı ve Qırımnıñ qaytaruv imkâniyeti arasında iç te bağ yoq. Bugün aqiqiy ekspert, siyasetşınas, cenkten ğayrı Qırımnı Ukraina nezareti altına artıq iç bir mehanizm qaytarmaycağını aytır», – dey siyasetşınas.

Ukraina, BMT Havfsızlıq şurasınıñ azası olıp, işbu teşkilâtnıñ işğal etilgen Qırım ve Rusiyeniñ Donbasstaki istilâsına diqaqatını celp etmege imkân berir, dep tüşüne Ukraina Tış işler nazirliginiñ hususiy vazifeleri boyunca elçisi Dmitriy Kuleba.

Oktâbr 15 künü Ukraina, memleket-azalarınıñ 177 reyini alıp, 2016-2017 ss BMT Havfsızlıq şurasınıñ azası oldı.

Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.

XS
SM
MD
LG