Ukraina, BMT Havfsızlıq şurasınıñ azası olıp, işbu teşkilâtnıñ işğal etilgen Qırım ve Rusiyeniñ Donbasstaki istilâsına diqaqatını celp etmege imkân berir, dep tüşüne Ukraina Tış işler nazirliginiñ hususiy vazifeleri boyunca elçisi Dmitriy Kuleba.
Bunı o oktâbr 20 künü Qırım.Aqiqat Radiosınıñ saba efirinde bildirdi.
«Veto aqqı, kerçekten de, Rusiyede qala ve şübemiz yoq ki, bu memleket onı ahlâqsızca qullanacaqtır. Amma BMT Havfsızlıq şurasınıñ bizge bergen diplomatiyanıñ, atta kürşeniñ diger aletleri de bar», – dedi Kuleba.
«Birinciden – kün tertibine nasıldır bir suallerniñ qoyulmasını teklif etmek, böylece, Qırım ve Ukraina şarqında Rusiye istilâsı meselelerini halqara havfsızlıqnıñ diger meselelerinden sebep unutmağa imkân berilmeycektir», – dedi o.
Oktâbr 15 künü Ukraina, memleket-azalarınıñ 177 reyini alıp, 2016-2017 ss BMT Havfsızlıq şurasınıñ azası oldı.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
