Link açıqlığı

İstanbul ava limanında Britaniya jurnalisti-uquq qoruyıcısını cansız alda taptılar


Qadın aqları oğrunda küreşken jurnalist, «Cenk ve sulhniñ aks etilmesi boyunca institut» cemaat uquq qoruyıcı teşkilâtınıñ İraq filialınıñ müdiri, britaniyalı Jacqueline Sutton İstanbul ava limanında cansız alda tapıldı. Mında jurnalist cumaertesi aqşam Londradan keldi ve İraqnıñ muhtar kürd regionıñ paytahtı Erbilge yol alğan edi.

Bunı bazarertesi künü, oktâbr 19-da, Sutton zenaatdaşları bildirip, ölüminiñ «sebeplerini belgilemege» tırışqanlarını qayd ettiler.

Türkiye matbuat vastaları yazğanı kibi, qadınnı üç Rusiye turisti ayaqyolda asılı taptı.

Taqiqatçılarnıñ malümatına köre, Sutton İraqqa uçqan uçağına yetiştirmedi ve diger seferge bilet almaq içün aqçası olmağanından açuvlı edi.

«Öz-özüni öldürgenine kimse inanmay», – dedi Barışıq ve serbestlik içün halqara qadın ligasında Sutton ile birlikte çalışqan Vanessa Farr.

Farr aytqanı kibi, Sutton, jurnalist olaraq, yaqında «İslâm devleti»niñ qadınlarğa nisbeten zulumına qarşılıq kösterilmesi içün million dollarğa grantnı qazandı.

«İşi ğayet ağır edi, qadın aqlarınıñ qorqmaz cesür qoruyıcısı edi, amma işine sadıq qalğan, er kesniñ tarafından sevilgen küçlü ve bahtlı insan edi», – dep qoştı o.

İraq parlamentiniñ spikeri Türkiye akimiyetini ziddiyetni ögrenmege çağırdı. Bunı Jacqueline Suttonnıñ dostları ve zenaatdaşları da rica ettiler.

50 yaşında Jacqueline Sutton evel ВВС alıp barıcısı edi, BMT ve diger teşkilâtlarda çeşit vazifelerni eda ete edi. İraq, Afganistanda qadın-jurnalistlerniñ aqlarını ögrene edi.

XS
SM
MD
LG