Link açıqlığı

Çubarov: qamaçav iştirakçileri Qırımğa Roshen mahsulatını ketirgen yük maşinalarını kirsetmediler


Qırım «erzaq» qamaçavınıñ iştirakçileri yarımadağa Roshen şirketiniñ mahsulatı ile 4 yük maşinanı kirsetmedi. Bunı Levıy bereg neşirine Qırımtatar Milliy Meclisiniñ reisi Refat Çubarov bildirdi.

«Emin oluñ, qaytarılğan maşinalar arasında Roshen yazısı ile maşinalar da bar edi. Birinci künleri öyle dört maşina qaytarıldı», – dey o.

Prezident memuriyeti qamaçavnıñ keçirilmesine keder etmege tırıştımı degen sualge Çubarov dey ki, ukrain akimiyetiniñ iç bir temsilcisi, Poroşenko da şu sırada, «kesen-kes qarşılıqnı bildirmedi».

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

XS
SM
MD
LG