Link açıqlığı

Qırımda maküm etilgen Yevromaydan iştirakçisi Aleksandr Kostenkonı Qırımdan Rusiye Federatsiyasınıñ koloniyalarından birine alıp ketmeleri mümkün. Bunı Aleksandr Kоstenkonıñ advokatı Dmitriy Sotniko Qırım.Aqiqat Radiosı efirinde bildirdi.

Sotnikovnıñ sözlerine köre, o imayesi altında bulunğannıñ ne yerde olğanını alâ daa bilmey.

«Onı bir yerge alıp ketseler, keçken bir afta içerisinde onı Omskqa qadar, er angi koloniyağa ketire bile ediler. Avtozakta bile alıp ketseler. Yani, memleket büyük, o qadar zor degil», – dey o.

Sotnikov şunı da qayd etti ki, imayecisiniñ muayyen vekâletleri bar, ve şimdi «qoruv aqqınıñ dos-doğru bozuluvı qayd etile».

«Şimdi Saşanı köteklegen FSB hadimleriniñ mesulyietke celp etilmemesi içün tekrar şikâyet etecegim. Şunıñ içün onıñ bulunuv yerini bilmek kerekim, aks alda mahkeme baquvnı red eter. Bugün ne yerde bulunğanını ise men bilmeyim», – dep añlata Sotnikov.

Advokat dey ki, qanuniy usullar oña tez areket etmege fırsat bermey. «Muracaatqa 30 kün içinde cevap bermege mümkün», – dey Sotnikov.

Ukraina vatandaşı, qırımlı Aleksandr Kostenko Aqmescitniñ №1 SİZOsından ğayıp oldı. Oktâbr 1 kününden onıñ bulunuv yeri aqqında ne imayecisi olğan anası, ne advokatı bile. Resmiy olmağan malümatlarğa köre, Kоstenko Rusiye mahkemesiniñ ükmüni – 3 yıl ve 11 aylıq apis cezasını körmek içün avuştırılğandır.

Taqiqatnıñ bildirgeni kibi, 2014 senesi fevral 18 künü «kütleviy nizamsızlıq» devamında Kоstenko Kiyevde «Berkut» Qırım mahsus hızmetiniñ hadimine zarar ketirdi.

Kostenko qabaatını tanımay. Avdokatı Dmitriy Sotnikov Qırımnıñ Yuqarı mahkemesine kassatsion şikâyetini berdi.

XS
SM
MD
LG