Qırımnıñ rusiyeli akimiyeti Aqmescitte Qırımtatar Milliy Meclisi binasınıñ «Qırım» Fondu» mülkiyetine qaytarılmasına ep keder etmege çalışa.
Bu aqta fondnıñ baş müdiri Riza Şevkiyev Qırım.Aqiqatqa bildirdi.
Onıñ aytqanı kibi, bunı Qırımnıñ rusiyeli jurnalistleri içün Meclis binasında «Matbuat eviniñ» olması ile bağlı planlar tasdiqaly.
«Anda «Matbuat evini» etecekleri aqqında bildirüvler – nevbetteki tariktir. Yani, «Qırım» fondundan qanunsız sürette binanı tutıp, Müftilikke berecek ediler. Amma o vaqıt Müftilik hırsıhzlanğan mülkniñ saibi olamaz dep aytqan edim. Bu tek musulman, islâm diniy qaidelerine degil, er bir dinniñ şartlarına ters kele», – dey Riza Şevkiyev.
Aytqanı kibi, «Qırım» Fondu» Aqmescitte Şmidta, 2 adresi boyunca yerleşken binanı «Kalga-Sultan» tarih ve medeniyet müzeyine bedava kirağa berdi. Amma müzey öyle de açılmadı.
Riza Şevkiyevniñ sözlerine köre, Aqmescitte Qırımtatar Milliy Meclisiniñ binası «Qırım» Fondu»nıñ mülkiyeti ola ve oña nisbeten mahkeme ketişatları alıp barılğanı sebebinden başqa bir kimsege teslim etilemez.
Qırım Rusiye tarafından 2014 senesi fevral 20 künü işğal etildi. Ukraina Yuqarı Radası bu tarihnı yarımada işğaliniñ başlanuvı künü olaraq ilân etti.
