Link açıqlığı

Ukrain sıñır bekçileri ve Qırım vatandaşlıq qamaçavınıñ iştirakçileri Herson vliyayetindeki blok noqtalarında videо nezaretini qurmağa qarar aldılar.

Bunı oktâbr 15 künü Ukraina Devlet sıñır hızmeti reisiniñ muavini Oleg Slobodân bildirdi.

Onıñ sözlerine köre, ukrain sıñırcıları aktsiya ştabınıñ toplaşuvlarında iştirak ete. Ştab erkânına Meclis ve cemaat teşkilâtlarınıñ temsilcileri kire. «Tünevin muşavere keçirildi, neticelde blokpostlarda video nezareti tertibatlarını qurmağa ve bir sıra iş ceetleri ile bağlı qararlar alındı», – dey Slobodân.

Qırım ile memuriy sıñırda tınç vaziyet saqlanıla, nezaret-kiriş noqtalarında nevbet yoq, Qırımğa taba ve keri yolcu aqımı eksilmekte.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

XS
SM
MD
LG