Qırım ile memuriy sıñırda tınç vaziyet saqlanıla, nezaret-kiriş noqtalarında nevbet yoq, Qırımğa taba ve keri yolcu aqımı eksilmekte, dep bildirdi oktâbr 15 künü Ukraina Devlet sıñır hızmeti reisiniñ muavini Оleg Slobodân.
«Vaziyet sakin, nevbet ya da nasıldır bir bozuluvlar qayd etilmey, kiriş noqtalarında vaziyet tınçtır. Umumen, em bu, em o tarafqa yolcu aqımınıñ eksilip kelmesini qayd etmemiz», – dedi o.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
