Aqmescitte okâtbr 14 künü Rusiye uquq qoruyıcıları Ukrain medeniy merkeziniñ üç azasını Bogdan Hmelnitskiy abidesi yanında yaqaladılar. Faaller Ukrain kazaklığı künü munasebeti ile abidege çeçek qoymağa kelgen edi. Olarnı ekstremizmge qarşılıq merkezine sorğuğa alıp kettiler.
Bunı Qırım.Aqiqatqa yaqalanğan faallerden biri Leonid Kuzmin añlattı.
«Abidege aqşamğa yaqın keldik, daa bir şey yapmağa yetiştirmedik, bizge politsiya hadimleri ve daa bir qaç insan keldi, vesiqalarnı köstermege rica ettiler. Olarnıñ bizde bar olğanını körip, iza bermege rica ettiler ve «E» merkezine alıp kettiler», – dey Kuzmin.
Onıñ aytqanına köre, daa eki faal bir eki saat iza bere edi. Yaqalanğanlardan aktsiya maqsadı ve munasebeti aqqında soray ediler.
«Uquq qoruyıcılarından bazıları alâ daa Ukraina İçki işler nazirliginiñ hadimleri olğanı aqqında bildireler. Telefon kitaplarını yazıp alğanlar, fotosüretlerni silip, yolladılar», – tarif ete Kuzmin.
«Maña UMM ekstremist teşkilât olaraq sayılğanı aqqında bildirdiler ve Rusiye Federatsiyasınıñ Cinaiy kodeksininiñ 2,82 maddesine köre – esktremist teşkilât ya da toplulıqnıñ meydanğa ketirilmesi kibi cinayet sayıla», – dey faali.
Dey ki, esas iddia – qanunsız mitingni keçirimek ıntıluvıdır.
Qırım uquq qoruyıcılarınıñ izaatları şimdilik yoqtır.
