Herson vilâyeti devlet memuriyeti bildire ki, Qırımnıñ «vatandaş» qamaçavınıñ iştirakçilerinen beraber kiriş noqtalarında 45 militsiya hadimi de nevbetçilik yapa.
«Herson vilâyetinde Ukraina İçki işler nazirligi idaresiniñ malümatına köre, Qırım ile memuriy sıñırdaki üç nezaret noqtasında vaziyetni közetken 45 militsiya hadimi buluna. Mında aman-aman 200 iştirakçi bar, olar yarımada ile ticaretni blok etüv aktsiyası devamında yarımadağa bir yük maşinasını bile kirsetmediler», – dep aytıla haberde.
Herson vilâyeti militsiyasınıñ yolbaşçı muavini İlya Kiva Qırım.Aqiqatqa bildirdi ki, er bir kiriş-nezaret noqtasında ekişer dane uquq qoruyıcı taqımı nevbetçilik yapmaqta.
Uquq qorçalayıcılar Qırım qamaçavında iştirak etken arbiy taqımlar insan aqlarını boza, dep bildirgen ediler. Bundan soñ Herson militsiyası Qırım ile «vatandaş» qamaçavınıñ iştirakçileri üzerinde nezaretni quvetleştirmege qarar aldı.
Sentâbr 20-de qırımtatar liderleriniñ teşebbüsi ile Qırımğa aşayt mahsulatı ve malını alıp ketken yük naqliyatını blok etüv aktsiyası başlandı.
Yarımadağa mal ve aşayt mahsulatınıñ ketirilmesini blok etken Qırımnıñ «vatandaş» qamaçavınıñ teşebbüsçileri ileride Qırımnıñ «energetik» qamaçavı ola bilecegini bildireler.
