Ukrainanıñ mustaqil zenaat birligi Ukraina akimiyetini Qırım memurları ve mahkemecileriniñ ATR qırımtatar telekanalınıñ sabıq operatorı Eskender Nebiyevge nisbeten areketlerine emiyet bermege çağıra. Böylece, media zenaat birligi narazılıq bildirip, Nebiyevge üküm çıqarğan mahkemecige qarşı şahsiy ceza kirsetmege talap ete.
Mustaqil media zenaat birliginiñ beyanatı oktâbr 13-te derc etildi.
Beyanatta aytıla ki, Eskender Nebiyevniñ mahküm etilmesi ile bağlı adise-vaqialar yarımadada işğalden evel olğan edi.
«Uquqçı ve adliyeciler işni talil etip, onıñ siyasiy sebepleri bar olğanını, em de ne ukrain, ne de halqara qanunlarğa riayet etkenini belgilediler», – dep qayd ete UMMZB.
«Elbet de, bu üküm ne Ukraina, ne de dünyada tanılacaq. Faqat onıñ menfiy devamına yol açıla – mahkemeler vastasınen jurnalistlerge qarşı basqı yapılacaq. İşğalcilerniñ mantığına köre, yarın Qırımda çalışqan ya da andan ketken er bir jurnalistni aynı şekilde mahküm etmek mümkün», – dep aytıla media zenaat birliginiñ beyanatında.
Bazarertesi künü, oktâbr 12-de, Aqmescitniñ Merkeziy rayon mahkemesi ATRniñ sabıq operatorı Eskender Nebiyevni «fevral 26 işi» boyunca eki yıl altı ayğa qadar şartlı olaraq apiske aldı.
2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar. Soñki apis cezası noyabr 19-da bitmek kerek.
