Suriyeniñ paytahtı Dimaşqta (Damask) Rusiye elçihanesine eki raketa ile urdılar, o saatte ükümet tarafdarları Moskvağa Suriyede endirgen darbeleri içün teşekkürler bildirmege toplaştı.
Vaqia yerinden kelgen malümatlarğa köre, birinci raketa binağa urıp, telâş sebebi oldı.
Adamlar dağılmağa başlağan soñ ekinci raketa binanıñ yanında tüşti.
Rusiye elçihanesiniñ malümatlarına köre, hadimlerden iç bir kimse zarar körmedi.
AFP agentliginiñ malümatına köre, darbe vaqtında aman-aman 300 insan Dimaşqtaki elçihane binası yanında toplaşqan edi.
Raketanı endirgenler belli degil.
Sentâbr soñunda Rusiye Suriyede ava darbelerine başladı, resmiy olaraq – «İslâm devletine» qarşı.
Faqat bu darbeler «İslâm devletine» qarşı degil de, onıñ raqipleri – diger islâmcılar, em de Ğarp ve arap dünyası qoltutqan muhalifetke qarşı endirile kibi haberler bar.
Ğarp memleketleri ve Suriye muhalifeti bildireler ki, Rusiye ekstremizm ile küreş içün degil, Suriye prezidentiniñ akimiyetini qaviyleştirmek içün arbiy kampaniyanı qullana.
