Link açıqlığı

Mustafa Cemilev ve Reşat Ametovnı «Qırımtatar halqı ögünde hızmetler» mukâfatı ile taqdirlediler


Qırımtatarlarnıñ milliy lideri Mustafa Cemilev ve Qırımda Ukraina topraq bütünligine qoltutqan ve öldürilgen Reşat Ametov Kiyevdeki qırımtatar cemiyetinden mukâfat aldılar.

Bunı Ukraina prezidentiniñ qırımtatar halqı işlerinden vekâletlisi Mustafa Cemilevniñ matbuat hızmeti bildire.

«Kiyevdeki qırımtatarlar cemiyeti qırımtatar halqınıñ lideri, Ukraina halq deputatı, Ukraina prezidentiniñ qırımtatar halqı işlerinden vekâletlisi Mustafa Cemilevni ve qırımtatar vatanperveri, Ukraina devletiniñ mustaqilligi ve topraq bütünligi oğrunda küreşken Reşat Ametovnı (ölüminden soñ) «Qırımtatar halqı ögünde hızmetler» mukâfatı ile taqdirledi», – dep aytıla haberde.

Oktâbr 12-de Cemiyet idaresiniñ ricası ile Qırım Muhtar Cumhuriyeti ve Aqyar işlerinden ükümet vekâletlisi Aslan Ömer Qırımlı Cemilevge zırh berdi. Reşat Ametovnıñ mukâfatı onıñ ailesine berilecek.

Cemiyet idaresiniñ qararına köre, Ametovnıñ qorantasına maddiy yardım kösterilecek.

2015 senesi iyül 17-de «Qırımtatar cemiyeti» qırımtatarlarnıñ yañı tarihında ilk sefer «Qırımtatar halqı ögünde hızmetler» zırhını tesis etti. Bu zırh qırımtatar halqınıñ aq-uquqları, serbestligi ve devletçiligini qorçalav ve ğayrıdan tiklev meselelerinde yararlıq qazanğan Ukraina ve çetel devletleriniñ vatandaşlarına berilecektir.

2014 senesi mart başında 39 yaşında Aqmescit sakini, üç balanıñ babası Reşat Ametov Rusiyeniñ Qırım işğaline qarşı çıqıp, Aqmescitteki Nazirler şurası binasınıñ yanında bir özü piket keçirdi. Narazılıq aktsiyası vaqtında «samooborona» vekilleri onı maşinağa oturtıp, belli olmağan bir yerge alıp ketti.

2014 senesi mart 15-de Reşat Ametov ölü tapıldı. Mart 18-de Ametovnı Aqmescit mezarlığında defn ettiler. Cinaiy iş açılğan edi. Cumhuriyet yolbaşçısı Sergey Aksenov «samooborona» vekilleriniñ Reşat Ametovnıñ öldürilmesine alâqası olmağanını bildirgen edi.

XS
SM
MD
LG