Yaqın Şarq tedqiqleri Merkeziniñ müdir muavini Sergey Danilovnıñ fikirince, soñki eki afta devamında Rusiyeniñ Suriyede endirgen arbiy darbeleri kimni ura kösterildi, ve bu «İslâm devleti» degil.
Bunı Danilov oktâbr 13-te Qırım.Aqiqat Radiosınıñ saba efirinde ayttı.
«Bugünki künde tam bir şey aytmaq mümkün, Rusiye Suriye muhalifeti, «Serbest Suriye ordusı» ve «Azat etüv cebesi» ile cenleşe – bu Al-Kaida ile bağlı olğanı tüşünilgen islâm teşkilâtlarınıñ koalitsiyasıdır. Olar Asadnıñ (Suriye prezidenti) ve ailesiniñ doğma yeri, Latakiya vilâyetine yaqlaşqan ediler, bu yer Suriyeniñ şimdiki rejimine qoltutqan esas bazadır», – dedi ekspert.
Onıñ aytqanına köre, «Rusiyeniñ endirgen darbeleri «İslâm devletini» urmadı».
«Bundan ğayrı, soñki dört kün devamında «İslâm devleti», tırnaqlar içinde ya da yoq, Rusiye Federatsiyasınıñ yardımından faydalanıp, Suriyede ücümge başlamaq içün bulunuv alanını kenişletti», – dep qayd etti Danilov.
Sentâbr soñunda Rusiye Suriyede ava darbelerine başladı, resmiy olaraq – «İslâm devletine» qarşı.
Faqat bu darbeler «İslâm devletine» qarşı degil de, onıñ raqipleri – diger islâmcılar, em de Ğarp ve arap dünyası qoltutqan muhalifetke qarşı endirile kibi haberler bar.
Ğarp memleketleri ve Suriye muhalifeti bildireler ki, Rusiye ekstremizm ile küreş içün degil, Suriye prezidentiniñ akimiyetini qaviyleştirmek içün arbiy kampaniyanı qullana.
