Link açıqlığı

Refat Çubarov uquq qorçalayıcılarnı Qırım qamaçavına qoşulmağa çağırdı


Qırımtatar Milliy Meclisiniñ reisi Refat Çubarov

Qırımtatar Milliy Meclisiniñ reisi Refat Çubarov uquq qorçalayıcılarnı Qırım qamaçavına qoşulmağa çağırdı. Bunı Çubarov salı künü, oktâbr 12-de, olıp keçken «Kiyev dialogı» konferentsiyasında ayttı.

«Men bu saanıñ ekspertleri ve uquq qorçalayıcılarnı yalıñız közetmege degil, yapqan işimizge qoşulmağa çağıram. Alan ofislerini açıñız, bizge yardım etiñiz», – dep ayttı Qırımtatar Milliy Meclisiniñ reisi.

Refat Çubarovnıñ ricası İnsan aqları Qırım alan missiyasınıñ Qırım qamaçavında iştirak etken arbiy taqımlar tarafından insan aqlarınıñ bozulmasından kelgen şikâyetler aqqında haberine cevap olaraq seslendirildi.

Meclis reisi Qırım qamaçavını 2013-2014 seneleri Maydan ile qıyasladı.

«Deñişmeler olmasını istegenler Kiyevniñ merkezinde toplaştı, yardım etkenler de keldi. Anda da aynı Maydan, amma çölde. Anda yel ve şaraitler yoq», – dep ayttı o.

Refat Çubarov qayd etti ki, uquq qorçalayıcılarnıñ malümatına cevap oldı, vaziyet deñişti. Meclis reisiniñ aytqanına köre, göñülliler arasında farqlı adamlar ola.

«Bunıñ kibi aktsiyalarda göñülliler iştirak ete, istegi olğan çeşit türlü insanlar kele bile. Deñiştirilmesi kerek olğan şeyler de ola bile, birinci basamaqta böyle şeyler çoq ola», – dep añlattı Çubarov.

Sentâbr 20-de qırımtatar liderleriniñ teşebbüsi ile Qırımğa aşayt mahsulatı ve malını alıp ketken yük naqliyatını blok etüv aktsiyası başlandı.

Qamaçav teşebbüsçileriniñ fikirince, ukrain şirketleri Qırım ile ticaret munasebetlerini toqtatmalı, çünki yarımada Rusiye Federatsiyası tarafından işğal etildi. Aktsiya teşkilâtçılarınıñ aytqanına köre, olar Qırımğa yük maşinalarını kirsetmemeli. Qamaçav iştirakçileriniñ belli talapları bar: siyasiy mabuslar azat etilecek, mustaqil kütleviy haber vastalarına basqı yapılmaycaq, yarımadağa halqara nezaretçiler serbest kirecek, qırımtatarlarğa qarşı areketler toqtatılacaq.

XS
SM
MD
LG